चौतारा– सिन्धुपाल्चोक जिल्लामा नदीको बगरबाट अवैधरुपमा नदीजन्य पदार्थको उत्खनन् र चोरी निकासी बढेको छ ।

सिन्धुपाल्चोक जिल्ला चौतारा साँगाचोकगढी नगरपालिका वडा नं. ११ मा रहेको बच्छला क्रसर उद्योगले अवैध रुपमा नदीजन्य पदार्थको उत्खनन् गरी निकासी गरेको पाइएको छ ।

खानी तथा नदीजन्य पदार्थको उत्खनन् कार्यको अनुगमनको जिम्मेवारी जिल्ला समन्वय समितिलाई दिइएको छ । जिल्ला समन्वय समिति सिन्धुपाल्चोकले असार १ गते नै सूचना जारी गरी ३ महिनासम्म नदीबाट नदीजन्य पदार्थ उत्खनन् गर्न नपाउने जनाएको थियो ।

नीतिगत व्यवस्था अनुसार सो समयमा बगर उत्खनन्‌मा एक्साभेटर (डोजर) को प्रयोग गर्न नपाइने जिल्ला समन्वय समितिका प्रमुख कृष्ण गोपाल तामाङ बताउछन् । तर सो सूचनाको बेवास्ता गर्दै बच्छला क्रसर उद्योगले खुलेआम रुपमा नदीमा नै एक्साभेटर (डोजर) लगाएर बालुवा उत्खनन् गरिरहेको छ ।

क्रसरले बगरमा बिहान, साँझ र राति एक्साभेटर परिचालन गरी बालुवा निकालेर निकासी गरिरहेको स्थानीयले बताए ।

अवैधरुपमा उत्खनन् र ढुवानीमा संलग्न व्यक्तिलाई पक्राउ तथा साधनलाई नियन्त्रणमा लिने, जरिवाना तिराउने र उत्खनन् भएका नदीजन्य वस्तु जफत गर्ने गरेको जिल्ला समन्वय समिति प्रमुख तामाङले बताए । सो बापत यस वर्ष मात्रै ३ लाख भन्दा बढी राजश्व संकलन भइसकेको उनले जानकारी दिए ।

सिन्धुपाल्चोक जिल्लामा २० वटा क्रसर उद्योग सञ्चालनमा रहेको घरेलु तथा साना उद्योग विकास समितिको कार्यालयले जनाएको छ । कार्यालयका प्रमुख रामशरण गौतमले जिल्लामा सञ्चालनमा रहेका क्रसर उद्योगहरुले आफूहरुलाई अटेर गरेको बताए ।