मोरङ- मोरङको सुनवर्षीमा ढुंगाले हानेर बाबुको हत्या गरेको आरोपमा प्रहरीले एक जनालाई पक्राउ गरेको छ ।

प्रहरीका अनुसार पक्राउ पर्नेमा सुनवर्षी नगरपालिका–४ का ४० वर्षीय दयालु ताजपुरीया छन् ।

उनले ६८ वर्षीय बाबु टीनताल ताजपुरियाको हत्या गरेको आरोप लागेको मोरङ प्रहरीले जनाएको छ ।

जिल्ला प्रहरी कार्यालय मोरङका डीएसपी मञ्जील मुकारुङका अनुसार मापसे गरेको विषयलाई लिएर भएको सामान्य घरायसी विवादमा उनले शनिबार बिहान ६ बजेतिर सुतिरहेकै बेला बुवालाई ढुङ्गाले हानेका थिए ।

ढुङ्गा प्रहारबाट गम्भीर घाइते भएका टीनताललाई उपचारका लागि विराटनगरको कोशी अस्पताल लगिएको थियो । तर कोशीले उपचार सम्भव नहुने भन्दै अन्य अस्पतालमा रिफर गरिदिएपछि गम्भीर अवस्थाका उनलाई लगेर घरमै राखिएको थियो ।

टीनतालको आज आइतबार बिहान ५:३० बजेतिर घरमा नै मृत्यु भएको हो ।