काठमाडौँ – नेपालमा बैशाख चार गतेबाट हुने थ्री नेशन्स टी २० सिरिजका लागि नेपाली राष्ट्रिय क्रिकेट टिमले होलीपछि प्रशिक्षण शुरू गर्ने भएको छ ।

क्यानको आज बसेको बैठकले प्रदेश एकमा रहेका मुख्य प्रशिक्षक डेभ ह्वाटमोर काठमाडौं फर्किएपछि मात्र प्रशिक्षण शुरू गर्ने निर्णय गरेको हो ।

नेपाल, नेदरल्याण्ड्स र मलेसिया सम्मिलित त्रिकोणात्मक सिरिजका लागि क्यानले एएनएस क्रियसनसँग मिलेर यो प्रतियोगिता गर्न लागेको हो । जसका लागि क्यानले सबै कुरा सो एजेन्सीलाई जिम्मा दिएको छ ।

त्यसबापत क्यानले मोटो रकम पाउने बुझिएको छ । स्रोतका अनुसार एएनएससँग क्यानले करिब साँढे एक करोड रूपैयाँको सम्झौता गरेको छ । यो विषयमा क्यानका शीर्ष पदाधिकारीसँग सम्पर्क गर्न खोज्दा सम्पर्क हुन सकेन । प्रतियोगिताको प्रत्यक्ष प्रशारणका साथै अरु सबैको जिम्मा सो एजेन्सीलाई दिएको छ ।

नेपालमा कोरोना महामारीको असर भएपछि खेलाडीले कुनैपनि अन्तर्राष्ट्रिय प्रतियोगिता खेल्न पाएका छैनन् । नेपालले खेल्ने भनेको स्कटल्याण्ड, नामिविया, पीएनजी, ओमानको टुरहरू स्थगित भएको छ भने घरेलु मैदानमा हुने सिरिज पनि स्थगित भएको थियो ।