अब्दाली– कुवेतमा एक नेपालीको कंकाल फेला परेको छ ।

कंकाल (हड्डी र खप्पर) कुवेतस्थित अब्दालीको मरुभूमिमाबाट करिब दुई किलोमिटर टाढा भेटिएको कुवेतको फौजदारी घटना विभागले जनाएको छ । विभागका अनुसार भेटिएको कंकाल केही समय अघि हराएका नेपाली नागरिकको रहेको अनुमान गरिएको छ ।

कंकाल बालुवाले ढाकेको अवस्थामा फेला परेको हो। जंगली कुकुरहरूले उक्त स्थानमा उत्खनन् गरेपछि घटना सार्वजनिक भएको ती अधिकारीले बताए ।

कुवेतको आन्तरिक मन्त्रालयलाई एक कन्ट्र्याक्टिङ कम्पनीमा काम गरिरहेका एक प्रवासीले फोन गरेर आफू काम गर्न जाँदै गर्दा मानव खप्पर देखेर प्रहरीलाई खबर गरेका थिए ।

अनुसन्धान विभागले उक्त स्थानमा थप कर्मचारी पठाएर हत्याराको पहिचान गर्न गरिरहेको जनाएको छ । साथै हत्यारा अझै कुवेतमै रहेको वा मुलुक छोडिसकेको छ भन्ने बारे पनि अनुसन्धान भैरहेको मन्त्रालयलाई उद्धृत गर्दै अरब टाइम्सले जनाएको छ । प्रहरीले उनको परिचय भने खुलाएको छैन ।