कानमा रौँ भएका मानिस कमै हुन्छन् । कानका रौँले स्वास्थ्यमा महत्त्वपूर्ण भूमिका खेलेको हुन्छ । यसले कानमा विभिन्न धुलो र नचाहिने कणलाई रोक्छ । तर कानमा बढी रौँ हुनु भने राम्रो मानिँदैन ।

जसको कानमा रौँ हुन्छ उनीहरू कन्जुस हुने, बाठो हुने वा आयु लामो हुने फरक फरक विश्वास समाजमा देखिन्छ । तर वैज्ञानिक शोधले भने कानमा लामो रौँ भए गम्भीर रोगको सिकार हुन सक्ने खतरा देखाएको छ ।

हालैको एक शोध अनुसार कानमा लामो-लामो रौँ हुनेहरूमा हृदय रोगको खतरा बढी हुन्छ । खास गरी सामान्य भन्दा लामो आकारको रौँ कानमा बाक्लो छ भने त्यस्ता व्यक्तिलाई हृदयाघातको खतरा समेत उच्च हुने उक्त शोध अध्ययनको निष्कर्ष छ ।

कानमा रौँ हुने समस्या वंशाणुगत भन्दा बढी अहिलेको जीवनशैली र आहार विहार रहेको वैज्ञानिकको बुझाइ छ । धूम्रपान गर्नेमा यो समस्या उच्च देखिने शोधले बताएको छ । शोध अनुसार कान र हृदयाघातको गहिरो सम्बन्ध छ । सन् १९७३ मा डा. सान्डर्स टी फ्रान्क र उनको टिमले अधिकांश हृदयाघातको समस्या हुनेहरूमा कानमा लामो रौँ हुने गरेको तथ्य बाहिर ल्याएको थियो ।

पुरुषको कानको लोतीमा चिरा परेको छ भने मुटुको कोरोनेरी धमनीमा रोग लागेको अनुसन्धानले पत्ता लगाएको छ । त्यस्तै कानमा थुप्रो रौँ हुनुले टेस्टोस्टेरोनको स्तर देखाउँछ । धेरै टेस्टोस्टेरोन हुने मान्छेलाई हृदयाघातको सम्भावना हुन्छ ।