काठमाडौँ- नेकपा एमालेका अध्यक्ष केपी शर्मा ओलीले सर्वोच्च अदालत संविधान कार्यान्वयन ठीक ढंगले भए नभएको हेर्नुपर्नेमा अतिरिक्त भूमिका निभाउन थालेपछि समस्या निम्तिएको बताएका छन् ।

एकैपटक  ७५३ वटै स्थानीय तहमा एमालेको पालिका अधिवेशन उद्घाटन गर्दै अध्यक्ष ओलीले परमादेश जारी गरेर एमालेलाई सरकारबाट हटाउन न्यायाधीशहरूको भूमिका रहेको र यसबारे अहिले एकअर्काको भूमिकाबारे न्यायाधीशहरू बोल्न थालेको बताए ।

संविधानको सही कार्यान्वयन भए नभएको हेर्नु पर्ने अदालत पाकिस्तानी शैलीमा परमादेश जारी गरेर सरकार हटाउनेमा लागेको भन्दै उनले फेरि सर्वोच्च अदालतको आलोचना पनि गरे ।

‘…सम्मानित सर्वोच्च अदालतले हेर्ने भनेको संविधानको सही प्रयोग भइरहेको छ कि छैन । त्यसको समुचित ब्याख्या गर्ने हो, दुनियाँमै कही नभएको कुरा  सरकार बनाउने र हटाउने कुरा पाकिस्तानी शैलीमा परमादेशबाट हुन थालेपछि लोकतन्त्र के हुन्छ । आज सर्वोच्च अदालतमा देखिएको छ तमासा ।’

अदालतलाई मर्यादित, निर्विवाद, विश्वासिलो बनाउनुपर्नेमा जोड दिँदै उनले अदालतमा तमासा देखाउन नहुने बताए ।

‘परमादेश त पाँचै न्यायाधीशले जारी गर्नुभएको हो नि’, ओलीले भने, ‘तर, एकजनाको मात्रै किन राजीनामा माग्नुहुन्छ श्रीमान् ?’