काठमाडौँ– चीनका विभिन्न विश्वविद्यालयमा एमबीबीएम अध्ययन गरेका तर कोरोना महामारीका कारण नेपाल आएकाले इन्टर्नसिप गर्न नपाएका विद्यार्थीहरुलाई इन्टर्नसिप गर्ने व्यवस्था मिलाउन संसदीय समितिले सरकारलाई निर्देशन दिएको छ ।

आइतबार बसेको प्रतिनिधिसभा अन्तर्गतको शिक्षा स्वास्थ्य समितिको बैठकमा सन् २०१५ र २०१६ औं ब्याजका विद्यार्थीहरुको इन्टर्नसिपका लागि नेपाल सरकारले चीनसँग आवश्यक कूटनीतिक पहलअघि बढाउनुपर्ने सांसदहरुले बताएका छन् ।

तत्काल चीन पठाउन नसक्ने अबस्थामा मेडिकल र इन्जिनियरिङ्ग विषयको प्रयोगात्मक परीक्षा गर्न समस्या भएका विद्यार्थीहरुका लागि नेपाल सरकारले समाधान खोज्नुपर्ने शिक्षा स्वास्थ्य समितिकी अध्यक्ष जयपुरी घर्तीले बताइन् ।

नेपाल मेडिकल काउन्सिलले चीनमा एमबीबीएसको अध्ययन पुरा गरेका सन् २०१४ ब्याजका विद्यार्थीहरुलाई नेपालमै इन्टर्नसिप गर्न दिने अनुमति दिए पनि सन् २०१५ र २०१६ औं ब्याजका विद्यार्थीहरुलाई भने हालसम्म अनुमित दिएको छैन ।

त्यस्तै जापानमा अध्ययन गर्न वैदेशिक अध्ययन अनमति पत्र (एनओसी) लिएका र जापान सरकारबाट पनि सिओई (अध्ययनका लागि आउन) अनुमति र भिसा पाएका विद्यार्थीहरुलाई पठाउन सरकारले कूटनीतिक पहल गर्न पनि सरकारलाई समितिले निर्देशन दिएको छ ।

नेपाल सरकार र मणिपाल कलेजबीच भएको सम्झौता समितिमा उपलब्ध गराउन र सो सम्बन्धमा मणिपाल कलेज बिक्री भएको हो वा होइन त्यसको वास्तविकता बुझी जानकारी गराउन पनि समितिले शिक्षा मन्त्रालयलाई निर्देशन दिएको छ ।