काठमाडौँ– राष्ट्रिय विपद् जोखिम न्यूनीकरण तथा व्यवस्थापन प्राधिकरणले आगामी तीन दिनसम्म भारी वर्षाको सम्भावना रहेकाले सर्तक रहन आग्रह गरेको छ ।

आगामी शनिवारसम्म पूर्वदेखि पश्चिम नेपालको पहाडी तथा तराई क्षेत्रमा ठूलो पानी पर्ने सम्भावना रहेको प्राधिकरणले जारी गरेको विज्ञप्तिमा उल्लेख गरिएको छ ।

पहाडी भू–भागमा भू–क्ष्य, पहिरो तथा गेग्रान बहावको जोखिम रहकाले नदीनाला र खहरे खोलामा पानीको सतह बढ्न सक्ने भएकाले सतर्कता अपनाउन प्राधिकरणले आग्रह गरेको हो ।

हाल मनसुनको न्यून चापीय रेखा नेपालको तराई भू–भाग नजिक रहेकाले अबको तीन दिन भारी वर्षाको सम्भावना रहेको जल तथा मौसम विज्ञान विभागले जनाएको छ ।

यो तीन दिनमा बाढी पहिरो, डुवान र कटानको जोखिम पनि देखिएकाले सम्बन्धित जिल्ला विपद् व्यवस्थापन समिति, सुरक्षा निकाय र स्थानी तहलाई खबर गर्न अनुरोध गरेको छ ।

विपद्को समयमा जेष्ठ नागरिक,अपांगता भएका व्यक्ति, महिला ,बालबालिकाको विशेष ध्यान राख्न सबैलाई अनुरोध गरिएको छ ।