काठमाडौँ- गृहमन्त्री बालकृष्ण खाँण र नेपालका लागि अमेरिकी राजदूत र्‍याण्डी बेरीबीच शिष्टाचार भेटवार्ता  भएको छ ।

आज मन्त्रालयमै पुगेर राजदूतले बेरीले द्विपक्षीय हित र चासोका विषयमा मन्त्री खाँणसँग छलफल गरेका हुन् । भेटका क्रममा राजदूत बेरीले मन्त्री खाँणलाइ बधाई दिदै नेपाल–अमेरिका दुई देशको सम्बन्ध सुदृढ रहनेमा आफू विश्वस्त रहेको बताएका छन् ।

भेटका क्रममा राजदूत बेरीले नेपाललाई थप खोप आवश्यक रहेको र सहयोगलाई प्राथमिकतामा राखेर उपलब्ध गराउने आश्वासन समेत दिएका छन् ।

जवाफमा मन्त्री खाँणले सरकारको प्रमुख प्राथमिकता जनतालाई महामारीबाट बचाउने र खोप उपलब्ध गराउनुका साथै प्रजातान्त्रिक प्रक्रियालाई सुदृढीकरण गर्ने रहेको बताए ।

भेटका क्रममा मन्त्री खाँणले कोरोना विरुद्धको लडाइँमा अमेरिकाले गरेको सहयोगप्रति आभार प्रकट गर्दै आगामी दिनमा पनि थप सहयोगको अपेक्षा गरेको मन्त्री खाँणको सचिवालयले जनाएको छ ।