जनकपुरधाम– यातायात कार्यालय जनकपुरधाममा अख्तियार दुरुपयोग अनुसन्धान आयोगको टोलीले छापा मारी कार्यालय सहयोगी र एक जना ‘दलाल’लाई ३ लाख बढी घुस रकमसहित पक्राउ गरेको छ ।

मंगलबार अख्तियारको टोलीले विभागमा छापामारेको हो । छापाका क्रममा घुस रकमसहित कार्यालय सहयोगी भोगेन्द्र कापर र दलाल राजकिशोर भगतलाई अख्तियारको टोलीले पक्राउ गरेको हो ।

कार्यालय सहयोगी कापरहो साथबाट २ लाख ५० हजार ८ सय २० रुपैयाँ र भगतको साथबाट ५० हजार रकम बरामद भएको अख्तियारका प्रवक्ता मनिराज ज्ञवालीले जानकारी दिए ।

उनीहरुको साथबाट चालक अनुमति पत्र लिनका लागि दिइने परीक्षाको प्रवेशपत्र र केही कागजात समेत फेला परेको उनले बताए ।

यातायात व्यवस्था विभाग धनुषाका छैटौँ तहका कर्मचारी तेजेन्द्र गिरी भनिने अनिल गिरीले कार्यालय सहयोगीमार्फत दलालसँग घुस लिन पठाएको सूचनाको अधारमा अख्तियारले छापा मारेको जनाएको छ ।

उनले दलालसँग केही दिन अगाडि चार पाङग्रे सवारी (स्काइभेटर, डोजर)को चालक अनुमति पत्र बनाइदिने भन्दै कार्यालय सहयोगी कापरलाई दलालभगतसँग घुस रकम लिन पठाएको सूचनाका अख्तियारले प्राप्त भएको थियो ।

घुस रकम माग गरेका मुख्य योजनाकार तेजेन्द्र गिरी भनिने अनिल गिरी फरार भएका छन् ।