नवलपुर– कोरोना भाइरस विरुद्धको कोभिसिल्ड खोप मंगलबार गण्डकी प्रदेशको तीन जिल्लामा पुगेको छ ।

बुधबारदेखि खोप लगाउने शुरु गरिने गरी तनहुँ, गोरखा र नवलपुरलाई कोभिसिल्ड भ्याक्सिन हस्तान्तरण गरिएको गण्डकी प्रदेश सरकारको सामाजिक विकास मन्त्रालय मातहतको प्रदेश स्वास्थ्य आपूर्ति व्यवस्थापन केन्द्र पोखराका कोल्ड चेन निरीक्षक हिमलाल सुवेदीले जानकारी दिए ।

नवलपरासीपूर्व लागि पठाएको जम्मा १ सय १७ एम्पुल कोभिसिल्ड भ्याक्सिन देवचुली नगरपालिकास्थित दुम्कौली स्वास्थ्य चौकीमा स्टोर गरिएको स्वास्थ्य कार्यालय प्रमुख केशव चापागाईले जानकारी दिए ।

प्रदेश स्वास्थ्य आपूर्ति व्यवस्थापन केन्द्र पोखराका कोल्ड चेन निरीक्षक सुवेदीले जिल्ला प्रशासन कार्यालय नवलपुरका प्रमुख जिल्ला अधिकारी मनमाया पंगेनीलाई खोपको प्याकेट हस्तान्तरण गरेका थिए ।

जिल्लामा १ हजार ५२ जनालाई पहिलो चरणमा दिइने खोपको मात्रा १ सय १७ भाइलमा प्रति भाइल १० जनाको अनुपातमा १ हजार १ सय ७० डोज मात्रा प्राप्त भएको स्वास्थ्य कार्यालय प्रमुख चापागाईले जानकारी दिए ।

चापागाइँकाअनुसार बुधबार कावासोतीस्थित मध्यबिन्दु जिल्ला अस्पतालबाट पहिलो चरणमा खोपको पहिलो मात्रा दिन शुरु गरिनेछ ।

बुधबारबाट सरकारको मापदण्डमा परेका पहिलो चरणमा स्वास्थ्यकर्मी, एम्बुलेन्स चालक, सरसफाईका कर्मचारीलाई  खोप दिइने स्वास्थ्य कार्यालयले जनाएको छ ।

खोपको पहिलो मात्रा दिएको १ महिनामा पुनः अर्को मात्रा दिनुपर्ने स्वास्थ्य कार्यालयले जनाएको छ ।

यसअघि पर्वत, बागलुङ र म्याग्दीका लागि सोमबार नै खोप पठाइएको प्रदेश स्वास्थ्य आपूर्ति व्यवस्थापन केन्द्रका निर्देशक खिमबहादुर खड्काले बताए ।