काठमाडौं– गत वैशाख अघि ४० प्रतिशत छायांकन पुरा भएको फिल्म ‘गोर्खा वारियर–२’को बाँकी छायांकन सिन्धुलीबाट सुरु भएको छ । बिहिबार सिन्धुलीको भद्रकाली मन्दिरमा पुजा गरेर छायांकन सुरु गरिएको हो ।

फिल्मका निर्देशक मिलन चाम्स हुन् । उनले सोलुखुम्बुसहित नेपालका केही स्थानमा छायांकन भइसकेको फिल्मको बाँकी दृश्य सिन्धुली र तनहुँमा खिचिने बताए ।

‘सिन्धुलीमा हामी तीन साता सुटिङ गर्नेछौं । यहाँ युद्धलगायतका दृश्यहरु खिचिनेछ’, निर्देशक चाम्सले भने ।

फिल्ममा युद्धको छायांकनका लागि आवश्यक पात्रका रुपमा गत महिना अडिसनबाट ३४ जना कलाकार चयन गरिएको थियो । तीसहित अहिले छायांकनमा मुख्य अभिनेता रितेश चाम्स र बिजय लामा रहेका छन् ।

फिल्ममा रेबिका गुरुङ, विजय लामा, रियर राई, भुवनसिंह राई, शिशिर बाङ्देल, बुद्धि तामाङ, कविता आले, वीरूप घले, सारा राई, मनोज केसीलगायतका कलाकारको अभिनय रहने छ ।

लन्डन सिनेआई प्रोडक्सनको प्रस्तुति र चाम्स इन्टरटेनमेन्टको सहकार्यमा निर्माण हुने फिल्ममा सह–निर्माताको रुपमा सुरेश राई छन् । फिल्म सन् २०२२ मा रिलिज हुनेछ । फिल्म विदेशका बेलायत, भारत, मलेशियामा छायांकन हुनेछ ।

फिल्ममा मिलन चाम्स र गिरिराज घिमिरेको लेखन, अर्जुन जिसीको सम्पादन, सुदीप बरालको डीओपी, हिमाल केसीको द्वन्द्व, शैलेन्द्र खनाल ‘शरद’को गीत, एलिस कार्कीको संगीत, राजेशपायल राईको गायन रहेको छ ।