टोकियो– जापानमा बुधबार सुरु भएको पारालोम्पिकमा अफगानिस्तानको राष्ट्रिय झण्डा फहराइएको छ । तर खेलाडी भने सहभागी छैनन् । बीबीसीका अनुसार अफगानिस्तानबाट दुईजना खेलाडी पारालोम्किका लागि छनौट भएका थिए । तर, अफगानिस्तानमा तालिबानको कब्जापछि उनीहरु सो प्रतियोगितामा सहभागी हुन नपाएका हुन् ।

जाकिया खुदादादी और होशनी रसौलीलाई पारातेक्वान्दोमा प्रतिनिधित्व गर्न पठाइँदै थियो । तर तालिबानको कब्जापछि उनीहरुले देश छाड्न पाएनन् । तर अन्तर्राष्ट्रिय पारालोम्पिक कमिटीले ती दुई खेलाडीलाई सुरक्षित निकालिएको जनाएको छ ।

अन्तर्राष्ट्रिय पारालोम्पिक कमिटीका एक प्रवक्ता क्रेग स्पेंसले उनीहरुलाई अफगानिस्तानबाट निकाल्ने प्रयास गरिएको र उनीहरु सुरक्षित स्थानमा रहेको जानकारी दिएका छन् । तर उनीहरु हाल कहाँ छन् भन्ने विषयमा भने उनले नखुलाएको बीबीसीले उल्लेख गरेको छ । बीबीसीका अनुसार जाकियाले जापान पारालोम्पिकमा सहागी हुने पहिलो अफगान महिला खेलाडी बन्ने थिइन् । तर, उनी सहभागी हुन पाइनन् ।