काठमाडौँ– छाडा छोडिएका काठमाडौँ उपत्यकाका कुकुरको आहार व्यवस्थापन गर्न गोल्यान समूहले आर्थिक सहयोग गरेको छ ।

छाडा छाडिएका कुकुरको संख्या वर्षेनी बढ्दै गएपछि नियन्त्रण गर्न गोल्यान समूहले कुकुरको बन्ध्याकरण गर्न पनि सहयोग गरेको छ ।

गोल्यान समूहले करिब ८ वर्षदेखि छाडा छाडिएका कुकुरको हेरचाह गर्दै आएको स्नेह केयरलाई सहयोग गरेको हो ।

जस अन्तर्गत गोल्यान समूहले १ हजार २०० सामुदायिक कुकुरलाई खाना खुवाउने र पहिलो चरणमा २०० कुकुरहरूको बन्ध्याकरण गर्न सहयोग गरेको गोल्यान समूहका निर्देशक अक्षय गोल्यानले बताए ।

स्नेह केयरका कर्मचारीसँग मिलेर गोल्यान समूहले मंगलबारदेखि कुकुरलाई खाना खुवाउने थालेको उनले बताए । यो कार्यमा गोल्यान समूहका कर्मचारी पनि सहभागी भएका छन् ।

उनले भने, ‘म आफूँ पनि जनावर प्रेमी भएकाले छाडा छाडिएका कुकुरहरूलाई खाना खुवाउन पाउँदा खुशी लागेको छ ।’
कुकुरलगायत अन्य छाडा छोडिएका पशु चौपायालाई गोल्यान समूहले वर्षेनी सहयोग गर्ने उनले बताए ।

कोरोना महामरीको समयमा कुकुरले खाना नपाउँदा हुनसक्ने जोखिमलाई मध्यनजर गर्दै भोका कुकुरलाई खाना खुवाउने योजना बनेको उनको भनाइ छ ।

छाडा छाडिएका कुकुरको हेरचाहमा स्नेह केयरले राम्रो काम गरेकाले यही केयरसँग मिलेर काम गरेको गोल्यान समूहले जनाएको छ ।

गोल्यानले भने, ‘पृथ्वीमा मानिसलाई जति नै अन्य जीव जनावरलाई पनि बाँच्न पाउने अधिकार छ । उनीहरूको अधिकार मानिसले नै रक्षा गरिदिनुपर्छ । हामी यही अभियानमा छौँ ।’

जनावरलाई बचाउने जिम्मेवारी आफूहरूले लिुनपर्ने उनको भनाइ छ ।

कार्यक्रम नै बनाएर स्नेहकेयरमा भएका तथा अन्य स्थानमा छाडा छोडिएका कुकुरलाई सहयोग गर्ने गोल्यान समूहको योजना छ ।

यो कार्यले जनवार प्रति हुने अमानवीय व्यवहार नियन्त्रणमा आउन सक्ने उनको विश्वास छ । छाडा छोडिएका पशुमाथि मानिसको अमानवीय व्यवहार बढ्दै गएको भन्दै उनले चिन्ता व्यक्त गरेका छन् ।

यो वर्ष चार चरणमा ४०० कुकुरको बन्ध्याकरण गर्न स्नेहकेयरलाई सहयोग गर्ने गोल्यान समूहको योजना छ ।

गोल्यान समूहले प्रत्येक चरणमा १०० कुकुरको बन्ध्याकरण गर्न सहयोग गर्नेछ । त्यस्तै १२ सय कुकुरलाई खाना खुवाउने योजनामा गोल्यान समूहको छ ।

गोल्यान समूहबाट सहयोग पाउँदा आफुलाई थप हौसला पुगेको स्नेय केयर सञ्चालिका स्नेह श्रेष्ठले बताइन । उनले भनिन, ‘उहाँहरूको सहयोगले यस क्षेत्रमा थप काम गर्ने हौसला मिलेको छ ।’

गल्लीका कुकुरले केही दिन भएपनि मिठो खान पाउने भन्दै श्रेष्ठले गोल्यान समूहलाई धन्यवाद दिइन ।
प्राइभेट क्लिनिकमा बन्ध्याकरण गर्न सात हजार भन्दा पनि बढी लाग्ने भएपनि आफुहरूले २ हजार ५०० रुपैयाँमा बन्ध्याकरण गर्ने गरेको उनले बताइन ।