कालीकोट – गृहमन्त्री रामबहादुर थापा (बादल) ले अदालतले प्रतिनिधिसभा विघटनको मुद्दा चाँडो किनारा लगाए निर्धारित समयमा नै निर्वाचन गर्न सकिने बताएका छन् ।

कालीकोटमा आज (सोमबार) आयोजित कार्यक्रममा बोल्दै उनले अदालतले संसद विघटनको फैसला गर्न ढिलो गरे निर्वाचनको मिति केही ढिलो हुनसक्ने समेत बताए ।

साथै उनले केपी ओली समूहको नेतृत्वको पार्टीलाई नै निर्वाचन आयोगले आधिकारिक मानेको समेत दाबी गरे ।

‘निर्वाचन आयोगले हिजो निर्णय दिएको छ, केपी ओली नेतृत्वको पार्टी नै आधिकारिक हो, हामीले कसैलाई हटाएका छैनौं, पार्टी फुटाएका छैनौं,’ उनले भने ।

उनले अब सूर्य चिह्नको विवाद पनि नरहेको र सूर्य चिह्न केपी ओली नेतृत्वकै हुने जिकिर गरे । कार्यक्रममा बोल्दै उनले प्रतिनिधिसभाको पुनःस्थापनाको माग गर्नेहरु प्रतिगामी भएको तर्क गरे ।

साथै उनले प्रधानमन्त्री केपी शर्मा ओलीले विप्लव समूहलाई चुनावमा सहभागी भएर मिलेर जाऊँ भनिसकेको पनि बताए ।

उनले कालीकोटमा विप्लवको बलियो प्रभाव रहेको भन्दै भने – यो जिल्लामा पनि विप्लवको प्रभाव छ, म आग्रह गर्छु, आउनुस्, बलियो कम्युनिस्ट पार्टीमार्फत तपाईंहरुका राजनीतिक माग पूरा गरौं ।