काठमाडौँ – शनिवार देशभरका इसाई धर्मालम्बीहरुले क्रिसमस मनाउँदैछन् । इसाईहरूको सबैभन्दा ठुलो यो पर्वमा विभिन्न कार्यक्रम आयोजना गरी धूमधामका साथ मनाउने गरिन्छ । यो पर्वलाई केवल इसाईहरूले मात्रै नभई गैर इसाईहरुलेसमेत विभिन्न मनोरञ्जनात्मक कार्यक्रम गरी मनाउँछन् ।

पुरातन इजिप्ट र रोमका मानिस सदाबहार बोटबिरुवाको शक्ति र सौन्दर्यमा विश्वास गर्थे । सोही समयदेखि नै घरघरमा सधैँ हरियो हुने बिरुवा राख्न सुरु भएको मानिन्छ । उनीहरू घरमा हरियो रुख हुँदा दुष्टात्मा टाढा भाग्ने विश्वास गर्थे ।

क्रिसमसमा विशेष पहिरन लगाउने गरिन्छ । जर्मनीमा यो परम्पराको सुरुवात सन् ७२२ ताका भएको मानिन्छ । यस्तै क्रिसमसमा सजाइने ट्री १६औँ शताब्दीमा सुरु भएको मानिन्छ । त्यस बेलाका महान् इसाई सुधारक मार्टिन लूथर सन् १५०० ताका क्रिसमसको पूर्वसन्ध्यामा हिउँले ढाकेको जंगल हुँदै हिँडिरहेका थिए ।

उनले बाटोमा हिउँले चम्किरहेको रूख देखे । रूखका हाँगा हिउँले भरिएको थियो, चन्द्रमामा चम्किरहेको थियो । त्यसैबाट प्रभावित भएका उनले घर फर्केर सल्लाको बोट लगाए । त्यसैमा धेरै मैनबत्ती पनि बाले । उनले सो रुख जिसस क्राइस्टको सम्मानका लागि तयार पारेका थिए । त्यसै समयदेखि क्रिसमस ट्रीलाई सजाउने परम्परा सुरु भएको मानिन्छ ।

अर्को मान्यता अनुसार प्रिन्स अल्बर्टले पहिलो क्रिसमस रूख सन् १८४१ मा इङ्ल्याण्डको विन्डसर क्यासलमा रोपेका थिए । प्रभु येशूको जन्म भएको समयमा उनका बाबुआमा मरियम र युसुफलाई बधाई दिन स्वर्गका प्रतिनिधिहरू आएका थिए । सो दिन एउटा रूखमा ताराको प्रकाश परावर्तन गराएर चम्किलो बनाइएको थियो । त्यहीँबाट क्रिसमस रूखको सजावटको प्रक्रिया सुरु भएको विश्वास छ । घरमा रुख सजाउँदा खुसी बढ्ने इसाईहरूको विश्वास छ ।

क्रिसमस ट्रीमा मैनबत्ती बाल्ने चलन १७औँ शताब्दीमा सुरु भएको मानिन्छ । क्रिसमसमा घरमा ट्री सजाउँदा र मैनबत्ती बाल्दा यसले बच्चाहरुको उमेर लामो हुने मान्यता छ ।