सनातन धर्मालम्बीहरुको घरमा एक मन्दिर हुनु सामान्य हो । धार्मिक आस्थाका कारण मानिसहरू घरका मन्दिरमा विभिन्न देवी देवताको मूर्ति राख्ने गर्दछन् । तर घरको मन्दिरमा कति मूर्ति राख्नु पर्दछ ? यसबारे धेरैमा अनभिज्ञता हुन सक्छ ।

वास्तु शास्त्र अनुसार घरको मन्दिरमा मूर्तिका संख्यामा कुनै रोक छैन । तर कुनै पनि देवताको एक भन्दा बढी मूर्ति भने राख्नु नहुने मान्यता छ । यदि कुनै देवताको एक भन्दा बढी मूर्ति वा तस्बिर भए त्यसलाई घरकै अर्को भागमा सम्मानका साथ राख्नु पर्दछ । यस्तै मन्दिरमा भएका मूर्ति राखी शान्त स्वभाव र आशीर्वाद दिएको मुद्राको हुनु पर्ने मान्यता छ । रौद्र रूपधारी मूर्ति घरमा राख्नु हुँदैन ।

यस्तै घरमा कुनै खण्डित, टुटेफुटेको वा पुरानो मूर्ति भए त्यसलाई तलाउ वा नदीमा विसर्जन गर्नुपर्ने मान्यता छ । यसो गर्न असम्भव भए घर कै कुनै सफा स्थानमा सम्मानका साथ भूसमाधि गरी दिनु पर्दछ ।

वास्तु अनुसार घरको मन्दिरमा राखेको कुनै पनि मूर्ति ढाड फर्किएको मुद्राको हुनु हुँदैन । यस्तो मूर्ति राख्नु अशुभ मानिन्छ । यसले भगवान रुष्ट हुने विश्वास गरिन्छ । यसको सट्टा भगवान्को सिधा अनुहार देखिने मूर्ति राख्नु पर्दछ । साथै घरका मन्दिरमा भएका सबै मूर्तिको आकार एकै समान भएका राख्नु पर्दछ । मन्दिरमा असमान आकारका मूर्ति राख्नु अशुभ मानिन्छ ।