काठमाडौँ– सरकारले आगामी सोमबारबाट दशैँका लागि अग्रिम टिकट बुकिङ खुलाएको छ । यससँगै दशैँका लागि उपत्यकाबाहिर जानेहरूले सम्बन्धित बसपार्क तथा टिकट काउन्टरमा भौतिक रुपमा वा अनलाईनबाटै पनि टिकट बुकिङ गर्न सक्नेछन् ।

यातायात व्यवस्था विभागले चाडपर्व लक्षित दशैँ तिहार र छठका लागि यातायात सहजिकरण सम्बन्धि सूचना जारी गरेको छ ।

–यातायात व्यवसायीहरूले अग्रिम टिकट बुकिङ गर्दा यथाशाक्य अनलाईन बुकिङ गराउनुपर्नेछ । जसअन्तर्गत व्यवसायीले छुट र सहुलियत समेत व्यवस्था गर्नुपर्नेछ ।

– अग्रिम टिकट बुकिङ तथा उपत्यका बाहिरिने र भित्रने यात्रुवाहक सवारीसाधनको ट्राफिक प्रहरी उपभोक्ता मञ्चसँग सहकार्य गरी अनुगमन गर्ने ।

– कोरोना भाइरस माहामारीलाई मध्यनजर गरी सवारी साधन सञ्चालन गर्ने, यसका लागि यात्रुलाई खाना/ खाजा खुवाउने स्थानमा भीडभाड नहुने गरी व्यवस्था गर्ने ।

–अनाधिकृत काउन्टर र व्यक्तिबाट टिकट विक्री गर्ने कार्यलाई पूर्णतया निरुत्साहित गर्ने/गराउने ।

– मुख्य सडकमा भएका खाल्डाखुल्डी पुरी यातयात सञ्चालनलाई सहज बनाउन सम्बन्धित निकायलाई अनुरोध गरी पठाउने ।

– आवश्यक सवारी साधनहरूको व्यवस्था यातयात व्यवसायी महासंघले गर्ने ।

–यातायात आवगमन सहज बनाउन खाद्यन्न लगायत अत्यावश्यक वस्तुहरूको ढुवानी गर्ने बाहेकका ट्रेलर लगायतका ठूला सवारी साधनहरू असोज २० गतेदेखि कार्तिक ३ गतेसम्म नारायाणघाटदेखि काठमाडौँसम्म रोक लगाउने ।

–यात्रुबाहक सवारी साधनलाई घटस्थापनादेखि कोजाग्रत पूर्णिमासम्म नेपालभर लागू हुने गरी रुट परमिट खुला गर्ने ।