काठमाडौँ– भारतमा चोरी गरी नेपाल ल्याइएका दुईवटा गाडीसहित दुई जना पक्राउ परेका छन् । उनीहरुलाई प्रहरीले काठमाडौँबाट पक्राउ गरेको हो ।

प्रहरीले बौद्धबाट दुईवटा चोरीको गाडीसहित मुस्ताङ घर भई बौद्ध बस्ने आग्या गुरुङ र भारत पश्चिम बंगाल घर भई बौद्ध बस्ने सोनाम टासी योल्मोलाई पक्राउ गरेको हो ।

बरामद गाडी भारतबाट चोरेर नेपाल ल्याएको हुन सक्ने महानगरीय अपराध महाशाखाका प्रहरी उपरीक्षक कृष्णप्रसाद कोइरालाले बताए । उनका अनुसार बरामद गाडीमध्ये एउटामा नेपाली नम्बर प्लेट र एउटामा भारतीय नम्बर प्लेट नै भेटिएको थियो ।

उनीहरुले यसअघि पनि भारतीय गाडी ल्याएको हुनसक्ने आशंकामा प्रहरीले अनुसन्धान शुरु गरेको छ । पक्राउ परेका दुवै जनालाई आवश्यक कारबाहीका लागि त्रिभुवन विमानस्थल भन्सार कार्यालयमा बुझाइएको महानगरीय अपराध महाशाखाले जनाएको छ ।