दाङ- सामाजिक सञ्जाल फेसबुक र टिकटकमा ‘फेक आइडी’ बनाएर  महिलालाई अश्लिल शब्द पठाएको आरोपमा प्रहरीले एक जनालाई पक्राउ गरेको छ ।

पक्राउ पर्नेमा दाङको घोराही उपमहानगरपालिका –१५ का १९ वर्षीय डेबिट पुन रहेका छन् ।

जिल्ला प्रहरी कार्यालय दाङका प्रवक्ता डीएसपी मुकुन्द रिजालका अनुसार पुनले महिलालाई अश्लिल शब्द पठाउने र पोष्ट गरेको उजुरीका आधारमा पक्राउ गरिएको हो ।

पुनविरुद्ध दुई जना महिलाले उजुरी दिएका थिए। अश्लिल शब्द लेख्ने र पोष्ट गर्ने पुनलाई सम्झाउन खोज्दा उल्टै महिलामाथि पुनले हातपात तथा दुर्व्यवहार गरेको पीडितले जाहेरीमा उल्लेख गरेका छन् ।

पुनलाई असार ६ गते पक्राउ गरी ‘अभद्र ब्यवहार’ कसुरमा मुद्दा चलाई अनुसन्धान भइरहेको प्रहरीले जनाएको छ ।