काठमाडौँ– नेकपा एमालेको स्थायी कमिटी बैठक प्रधानमन्त्री निवास बालुवाटारमा जारी छ ।

बैठकमा कांग्रेस सभापति शेरवहादुर देउवालाई प्रधानमन्त्री बनाउन हस्ताक्षर गर्ने माधव नेपाल समूहका सांसदहरुलाई कारवाही गर्ने विषयमा छलफल भइरहेको बुझिएको छ ।

यसैगरी बैठकमा विपक्षी गठबन्धनले सर्वोच्चमा दायर गरेको रिट निवेदनमा हस्ताक्षर गर्ने नेपाल पक्षका २३ सांसदमाथि पनि कारवाही गर्ने विषयमा छलफल भइरहेको एक नेताले जानकारी दिए ।

यसअघि शनिबार बसेको स्थायी कमिटी बैठकले देउवालाई प्रधानमन्त्री बनाउन प्रस्तावका लागि हस्ताक्षर गर्ने २६ सांसदमध्ये ११ सांसदलाई स्पष्टीकरण माग गर्ने निर्णय गरेको थियो ।

बैठकले माधवकुमार नेपाल, झलनाथ खनाल, भीम रावल, मुकुन्द न्यौपाने, रामकुमारी झाँक्री, कल्याणी खड्का, सरला यादव, पुष्पा कर्ण, लक्ष्मी चौधरी, कलिला खातुन र निरा जैरुलाई स्पष्टीकरण सोध्ने निर्णय गरेको थियो । स्पष्टीकरणको म्याद आजै बिहान सकिएको छ । तर माधव नेपाल पक्षले स्पष्टिकरण दिएका छैनन् ।

उनीहरुले स्पष्टीकरण नदिएपछि थप कारवाही गर्ने विषयमा छलफल भइरहेको उनले बताए । बैठकमा घोषित आगामी चुनावको तयारी तथा विपक्षी दलहरूले गरिरहेको विरोधका विषयमा पनि छलफल भइरहेको उनले बताए ।