कञ्चनपुर— सुदूरपश्चिममा थप दुई जना कोरोना संक्रमितको मृत्यु भएको छ । सेती प्रादेशिक अस्पतालमा उपचाररत् कञ्चनपुरको भीमदत्त नगरपालिका–४ की ५० वर्षीया महिलाको शनिबार मृत्यु भएको हो ।

सेती अस्पतालका सूचना अधिकारी दिलिप कुमार श्रेष्ठका अनुसार ती महिला बिहीबार अस्पतालमा भर्ना भएकी थिइन् । शुक्रबार कोरोना पुष्टि भएपछि आइसियूमा उपचाररत् उनमा श्वासप्रश्वासमा समस्या देखिएको श्रेष्ठले बताए ।

यस्तै, कञ्चनपुरको भीमदत्त–१८ का ४० वर्षीय कोरोना संक्रमित पुरूषको पनि शनिबार मृत्यु भएको छ । एक हप्ता अगाडि भारतको इन्दौरबाट आएका पुरूषको महाकाली अस्पतालमा उपचारका क्रममा मृत्यु भएको हो ।

उनमा ज्वरो आउने लक्षण देखिएको थियो । गत बिहीबार अस्पताल भर्ना भएका उनमा शुक्रबार कोरोना पुष्टि भएपछि आइसियूमा राखेर उपचार भइरहेको थियो ।

उनको शनिबार दिउँसो १ बजे मृत्यु भएको महाकाली अस्पतालका सूचना अधिकारी नारद भट्टले जानकारी दिए । योसहित सुदूरपश्चिम प्रदेशमा कोरोनाबाट मृत्यु हुनेको संख्या ६१ पुगेको प्रदेश स्वास्थ्य निर्देशनालयले जनाएको छ ।