औषधीय गुणले भरिपुर्ण अमलाको सेवन शरीरमा प्रतिरोधात्मक क्षमता बढाउन वा रोगहरुसँग लड्ने क्षमता बढाउनकालागि राम्रो मानिन्छ । तर तपाईंलाई थाहा छ, अमलाको उत्पती कसरी भयो ?

धार्मीक मान्यता अनुसार अमला केवल सेवनकालागि मात्र नभई पुजनिय समेत छ । यस अलावा अमलाको रुखको समेत विधिविधान अनुसार पूजा समेत हुने गर्दछ । फाल्गुन शुक्ल पक्षको आमलकी एकादशी र कार्तिक शुक्ल पक्षको नवमी तिथिमा अमलाको रुखको पूजा हुने गर्दछ । तर किन अमलालाई पुजा गरिन्छ ? के छ यसको धार्मीक मान्यता ?

अमलाको रुखलाई धातृ वृक्ष पनि भनिन्छ । यसलाई धर्मको आधार पनि मानिन्छ । धार्मीक मान्यता अनुसार यो वृक्ष भगवान विष्णुलाई समेत प्रिय छ । पौराणिक कथा अनुसार सृष्टिको सृजनाको क्रममा सबैभन्दा पहिले अमलाको वृक्ष उत्पन्न भएको थियो । त्यसैले यसलाई आदिरोह वृक्ष पनि भनिन्छ । मान्यता अनुसार जसरी समुन्द्र मन्थनका क्रममा जहाँ जहाँ बिषको घडाबाट थोपा धर्तीमा पर्‍यो त्यहा भांग धतूरो जस्तो बुटी उम्रिए भने अमृत छल्किएर खसेको ठाँउमा अमला र अन्य गुणकारी वृक्षको उत्पती भयो ।

अर्को धार्मीक मान्यता अनुसार ब्रम्हाको आशुंबाट अमला वृक्ष उत्पत्ति भएको हो । पद्म पुराण र स्कन्द पुराणका कथा अनुसार पृथ्वी जलमग्न भएको बेला ब्रम्हाको मनमा सृष्टिलाई पूनः सृजना गर्ने विचार आयो र कमल पुष्पमा बसेर ब्रम्हाले परब्रम्हाको तपस्या गर्न थाले । ब्रम्हाको तपस्याबाट खुशी भएर परब्रम्हा प्रकट भए । यो देखेर ब्रम्हा खुशीले रुन लागे र उनको आँसु खस्यो । जो अमलाको वृक्षको रुपमा उत्पन्न भयो ।