केही दशकयता मानिसहरु शारीरिक श्रम नगर्ने पेशामा बढि सक्रिय छन् । पहिले पहिले मानिसहरु खेती किसानी काममा व्यस्त हुन्थे । तर आजकल बसिबसि गर्ने काम सबैको रोजाईमा पर्दछ । तर यस प्रकारको काम वा लामो समय बस्ने गर्दा स्वास्थ्यमा भने नकारात्मक असर पर्ने गर्दछ ।

चिकित्सकहरु जो व्यक्ति जति कम बस्छ त्यो त्यति बढी बाँच्न सक्छ भनेर सुझाउँछन् । दिनहुँ ३ घण्टाभन्दा कम बस्ने मानिसहरु धेरै बस्ने मानिसको तुलनामा बढि बाच्ने गर्दछन् । एक अध्ययन अनुसार दैनिक ३ घण्टाभन्दा कम बस्ने मानिसको आयू एक दशमलव चार वर्ष बढ्न सक्छ । तसर्थ लामो समय बस्नुको सट्टा करेसाबारीको काम गर्ने, वा कुनै पनि शारीरिक श्रम हुने काम गर्न चिकित्सक सुझाव दिन्छन् ।

कार्यालयको काम बसेर नै गरिन्छ । तर कार्यालयबाट घर आएपछि पनि मानिसहरु ओच्छ्यानमा पल्टेर लामो समय मोवाइल चलाउँछन् । सुतेर टिभी हेर्छन् वा सोफामा बस्ने गर्दछन् । तर यस्ता क्रियाकलापले स्वास्थ्यमा खराबी देखिनुको साथै मधुमेह, मुटुरोग र हृदयाघात हुने संभावना बढाउँछ ।

पछिल्लो समय वृद्धहरु मात्र नभई बालबालिका र वयस्क समेत बसेर समय बिताउँछन् । यस्तोमा उनीहरुमा स्वास्थ्यको जोखिम बढ्दछ । तर यसको सट्टा हिडडुल, व्यायाम वा अन्य काममा सक्रिय भएमा जीवनको आयू दुई वर्षसम्म बढ्न सक्छ ।