शनिबार धेरैकालागि महत्वपुर्ण बार मानिन्छ । बिदाको दिन हुने भएकाले कामकाजीहरुले फुर्सद मनाउने, घुमघाम गर्ने, आफन्तजन भेट्ने, किनमेल गर्ने वा घरका सन्तानलाई समय दिने काम यहि शनिबार हुने गर्दछ । यस अलावा धार्मीक रुपमा समेत शनिबारको विशेष महत्व छ ।

धार्मिक ग्रन्थहरुमा शनिबारलाई विशेष दिन मानिन्छ । नौ ग्रहमा वर्णित गरिएको ब्रहमान्डको न्यायाधीश नै शनिलाई मानिन्छ । ज्योतिषय मान्यता अनुसार शनिदेवलाई खुशी पारे जीवनमा नयाँ उर्जा ल्याउन सकिन्छ । त्यसैले हरेक हप्ता शनिदेवलाई तेल दान गर्ने, पुज्ने र व्रत बस्ने परम्परा रहँदै आएको छ । शनिबारको व्रत गर्दा शनि ग्रहको अनिष्ट फलको परिशमन हुने धार्मीक विश्वास छ । धनधान्य वृद्धि एवं व्यापार वृद्धिको उद्देश्यले पनि यो व्रतको पालना गरिन्छ ।

शनी भगवान सूर्यका पुत्र हुन् । उनकी आमाको नाम छायाँदेवी हो । यमराज उनका भाई हुन् । यस्तै यमुना उनकी बहिनी हुन् । शनिदेवको उपासना मानवकालागि शुभ मानिन्छ । शनिको उपासना गर्दा शनिबार तेल दान बाहेक पिपलको विशेष पूजा गर्नुपर्दछ । यस्तै यस दिन कालो तिल दान गर्ने परम्परा छ । छालाका जुत्ता र चप्पल पनि दान गर्ने चलन छ ।