काठमाडौँ– सवारी साधनको अनलाइन कर भुक्तानीका लागि वाग्मती प्रदेशमा ‘यातायात व्यवस्था सूचना प्रणाली’ को शुभारम्भ गरिएको छ ।

शुक्रबार मकवानपुरको हेटौँडामा प्रदेशका मुख्यमन्त्री डोरमणि पौडेलले यातायात व्यवस्था सूचना प्रणालीको शुभारम्भ गरेका हुन् । प्रणालीको शुभारम्भ भएसँगै वाग्मती प्रदेशका यातायात सम्बद्ध कर तथा राजस्व घरमै बसेर अनलाइनबाट भुक्तानी गर्न सकिने बताइएको छ ।

सवारी चालक अनुमति शुल्क, सवारी कर, ब्लू बुक नवीकरण शुल्क, जरिवाना लगायतका राजस्व भुक्तानी अनलाइनबाट घरमै बसेर भुक्तानी गर्न सकिने प्रदेशको भौतिक पूर्वाधार विकास मन्त्रालयले जानकारी दिएको छ । त्यस्तै सेवाग्राहीले अब सवारीसाधनको राजश्व विवरण घरमै बसेर हेर्न र अनलाइनमार्फत दाखिला गर्न सक्नेछन् ।

कार्यक्रमको शुभारम्भ गर्दै मुख्यमन्त्री पौडेलले प्रदेशमा सुशासनको युग शुरू भएको बताए । उनले अब विद्युतीय बस सञ्चालन गर्नका लागि टेन्डरको आह्वान भइसकेको भइसकेको जानकारी दिए । भीमफेदीदेखि कुलेखानीसम्मको सुरुङमार्गका लागि पनि टेन्डरको प्रक्रियामा जाने उनले बताए ।

वाग्मती प्रदेशमा रहेका १० वटा यातायात सेवा व्यवस्था कार्यालयहरूमध्ये हाल ६ वटा कार्यालयबाट यो सेवाको सुरुवात गरिएको जनाइएको छ । वाग्मती प्रदेशमा हालसम्म १६ लाख ४७ हजारभन्दा धेरै सवारी दर्ता भइसकेको वाग्मती प्रदेशको भौतिक पूर्वाधार विकास मन्त्रालयका सचिव संजिव बरालले जानकारी दिए ।