जनकपुरधाम– जनकपुर–ढलकेवर सडकखण्डअन्तर्गत स्रोत नखुलेको ४० लाख रुपैयाँसहित एक जना पक्राउ परेका छन् । मंगलबार सोही सडक खण्ड अन्तरगत मटिहानीस्थितबाट स्रोत नखुलेको रकमसहित महोत्तरी प्रहरीले पक्राउ गरेको हो ।

धनुषाको मुखियापट्टी मुसरनियाँ गाउँपालिका–१ का ३८ वर्षीय संजयकुमार साह पक्राउ परेको जिल्ला प्रहरी कार्यालय महोत्तरीका प्रहरी उपरीक्षक दिनेशकुमार आचार्यले बताए । साह जनकपुरमा धनलक्ष्मी ज्वेलर्स (सुनचाँदीको पसल) सञ्चालक हुन् ।

टीभीएस कम्पनीको अनटेस्ट मोटरसाइकलबाट जनकपुर आउँदै गर्दा मटिहानी नगरपालिका ९ विग्ही खोलास्थित चेकजाँच गर्ने क्रममा उनी पक्राउ परेका हुन् ।

प्रहरीले उनको साथबाट स्रोत नखुलेको ३९ लाख ८० हजार बरामद गरेको हो । पक्राउ परेका साहलाई आवश्यक कारबाहीका लागि मोटरसाइकलसहित जिल्ला प्रहरी कार्यालय महोत्तरीको हिरासतमा राखिएको छ ।