काठमाडौँ– संसद विघटनविरुद्ध सर्वोच्चमा रिट हाल्न विपक्षी गठबन्धनका सांसदहरूको हस्ताक्षर संकलन शुरू गरिएको छ ।

गत शुक्रबार मध्यरात प्रधानमन्त्री केपी शर्मा ओलीको सिफारिशमा राष्ट्रपति विद्यादेवी भण्डारीले संसद् विघटन गरेपछि विपक्षी दलहरू कानुनी लडाईंका लागि सर्वोच्च जान लागेका हुन् ।

विपक्षी गठनबन्धनले कांग्रेस सभापति शेरबहादुर देउवालाई प्रधानमन्त्री बनाउने पक्षमा हस्ताक्षर गर्ने १४९ सांसदहरुलाई सिंहदरबार बोलाएर हस्ताक्षर संकलन शुरू गरिएको छ।

पार्टीका आधारमा सांसदहरूको छुट्टा छुट्टै हस्ताक्षर संकलन गरिँदै छ । सबैको हस्ताक्षर संकलन गरेर संसद् विघटनविरुद्ध सर्वोच्च अदालतमा रिट हाल्ने तयारी विपक्षी गठबन्धनको छ । यसैबीच नेकपा एमालेको माधव नेपाल समूहले भने नयाँ बानेश्वरस्थित संघीय संसद भवनमा आफू पक्षका सांसदहरूको हस्ताक्षर संकलन गरेको छ ।

नेपाल समूहका १९ सांसदको हस्ताक्षर संकलन भइसकेको नेता सुरेन्द्र पाण्डेको भनाइ छ ।