काठमाडौँ– गृहमन्त्री रामबहादुर थापा ‘बादल’ र नेपालका लागि अस्ट्रेलियाली राजदूत फेलिसिटी भोल्ककोबीच शिष्टाचार भेटवार्ता भएको छ ।

मंगलबार गृह मन्त्रालयमा भएको भेटमा नेपाल–अस्ट्रेलिया द्विपक्षीय हित र आपसी सहकार्यका विषयमा छलफल भएको मन्त्रालयले जनाएको छ ।

भेटमा गृहमन्त्री थापाले नेपालमा राजदूतको रुपमा कार्यभार सम्हालेकोमा राजदूत फेलिसिटीलाई बधाई दिनुका साथै सफल कार्यकालको शुभकामना व्यक्त गरे ।

उनले कोरोना संकटमा अस्ट्रेलियामा रहेको नेपालीहरुको सुरक्षाका लागि अस्ट्रेलियाले देखाएको चासोप्रति आभार प्रकट गरे ।

गृहमन्त्री थापाले नेपाललाई अस्ट्रेलियाले गर्दै आएको सहयोगका लागि धन्यवाद दिँदै आगामी दिनमा समेत त्यसले निरन्तरता पाउने विश्वास व्यक्त गरे । भेटमा उनले नेपालमा अस्ट्रेलियाली लगानीका लागि भूमिका खेल्न राजदूतसँग आग्रह गरेको मन्त्रालयले जनाएको छ ।

भेटमा राजदूत फेलिसिटीले नेपाल–अस्ट्रेलिया सम्बन्धको चर्चा गर्दै नेपालको ‘समृद्ध नेपाल सुखी नेपाली’को अभियानलाई सफल पार्न अस्ट्रेलियाको साथ र सहयोग रहने प्रतिवद्धता व्यक्त गरिन्।