काठमाडौँ – इटालियन सिरी ‘ए’ को शीर्ष टोली नेपोलीलाई इन्टर मिलानले पराजित गरको छ।

आइतबार सम्पन्न खेलमा इन्टरले नेपोलीलाई ३-२ ले पराजित गर्दै यस सिजनमा पहिलो हारको स्वाद चखाएको छ ।

१७औं मिनेटमा पियोट जिल्नेस्कीको गोलमा नेपोलीले अग्रता लिएपछि २५औं मिनेटमा हकान चालहनोग्लुले १-१ को बराबरीमा पुर्‍याएका थिए ।

४४औँ मिनेटमा इभान पेरिसिचको गोलमा इन्टरले फेरि अग्रता लियो । ६१औं मिनेटमा मार्टिनेजले इन्टरको अग्रता ३-१ मा पुर्‍याए ।

द्रिइस मार्टिन्सले खेल सकिन ११ मिनेट बाँकी रहँदा गोल गरेपनि त्यो नेपोलीका लागि पर्याप्त भएन ।

१३ खेलमा ३२ अंक जोडेको नेपोली सिरी ‘ए’ को शीर्ष स्थानमा यथावत छ । समान खेलमा समान ३२ अंक बटुलेको एसी मिलान दोस्रो स्थानमा छ भने समान खेलमा २८ अंकसहित इन्टर तेस्रो स्थानमा छ ।