काठमाडौँ– नेकपा (एमाले) ले महाधिवेशनको प्रतिनिधि चयनसम्बन्धी मापदण्ड तय गर्न केन्द्रीय कमिटी बोलाउने निर्णय गरेको छ ।

तुल्सीलाल स्मृति प्रतिष्ठानमा शुक्रबार बसेको एमाले स्थायी कमिटी बैठकले राष्ट्रिय महाधिवेशनको बिषयमा छलफल गर्न र प्रतिनिधि चयनसम्बन्धी मापदण्ड तय गर्न यही कात्तिक १२ गते केन्द्रीय कमिटी बोलाउने निर्णय गरेको हो ।

सोही विषयमा नै छलफल गर्न कात्तिक ११ गते स्थायी कमिटी बैठक बोलाइएको एमाले प्रवक्ता प्रदीप ज्ञवालीले जानकारी दिए । बैठकले महाधिवेशनका लागि स्थायी कमिटी सदस्य रामबहादुर थापाको नेतृत्वमा गठित २१ सदस्यीय मूल व्यवस्थापन समितिलाई पूर्णता दिएको प्रवक्ता ज्ञवालीले जानकारी दिए ।

त्यस्तै राष्ट्रिय महाधिवेशन प्रतिनिधि चयनका लागि २०७७ चैत्र मशान्तसम्म नवीकरण र नयाँ सदस्यता बनेका योग्य हुने निर्णय बैठकले गरेको छ ।

महाधिवेशनमा नेतृत्व चयनका लागि विद्युतीय मतदान मेशिन प्रयोग गर्ने निर्णय पनि बैठकले गरेको छ । त्यस्तै बैठकले १० बँुदे सहमति कार्यान्वयनका लागि देखिएका समस्या केन्द्रीय कमिटी बैठक अघि नै समाधान गर्ने निर्णय भएको प्रवक्ता ज्ञवालीले बताए ।

यसैबीच १० बुँदे सहमति कार्यान्वयनका लागि गठित कार्यदलबाट उपाध्यक्ष भीम रावलले राजीनामा दिएका छन् । स्थायी कमिटी बैठकमा १० बुँदे सहमति कार्यान्वयन नभएको भन्दै रावलले राजीनामा दिका हुन् । कार्यदलमा भएको छलफल र पार्टीले गरेको निर्णयसमेत मान्य नहुने भएपछि कार्यदलमा बस्नुको औचित्य नभएको भन्दै राजीनामा दिइएको उनले बताए ।

रावलले १० बुँदे सहमतिका विषयमा फरक मत पनि राखेका छन् । स्थायी कमिटीले दुई जना नेतालाई केन्द्रीय कमिटी सदस्य मनोनित गरेकामा पनि उनले असहमति जनाए । शुक्रबारको बैठकले रौतहटका कुन्दन कुशवाहा र बाराका मोहम्मद समिरलाई केन्द्रीय सदस्य मनोनित गर्ने निर्णय गरेको थियो ।