दाङ– अभिनेता आकाश श्रेष्ठले करिब दुई वर्षदेखि कोरोनाले थिलोथिलो परेको फिल्म क्षेत्रलाई चलायमान बनाउन फिल्म प्रदर्शनको वैकल्पिक माध्यम खोज्नुपर्ने बताएका छन् ।

चलचित्र पत्रकार संघ नेपाल,दाङ शाखाले आयोजना गरेको ‘चलचित्र क्षेत्रको चलायमान कसरी र कहिलेबाट’ विषयक कार्यक्रममा अभिनेता श्रेष्ठले दर्शक हलमै गएर फिल्म हेर्ने वातावरण बन्न केही समय लाग्ने भएकाले दर्शकसम्म नै फिल्म पुर्‍याउन ओटिटी प्लेटफर्मसहितका विकल्प खोजिनुपर्ने बताए ।

‘यदि यसो गर्न सकियो भने नेपाली फिल्म हेर्ने दर्शक घट्दैनन् । कोरोना कहरमा दर्शकले घरमै बसेर विश्वका राम्रा फिल्महरु हेरिसकेकाले अब हामीले बनाउने फिल्मले दर्शकको त्यो चाहना मेट्नसक्नुपर्छ । अन्यथा फेरि दर्शक नेपाली फिल्मबाट टाढिन सक्छन्,’ उनले चिन्ता व्यक्त गरे ।

चलचित्र पत्रकार संघ दाङका अध्यक्ष शिव पुनको अध्यक्षतामा भएको अन्तरक्रिया कार्यक्रममा निर्माता तथा निर्देशक ऋषिराज आचार्य, गायिका विन्दु परियार, नेपाल पत्रकार महासंघ दाङका कोषाध्यक्ष शरद रेग्मीलगायतले फिल्म क्षेत्र धरासायी बन्दै गएको भन्दै यसलाई चलायमान बनाउन जिम्मेवार सबै पक्ष लाग्नुपर्ने सुझाए ।