काठमाडौँ– नेकपा एमालेका नेता माधवकुमार नेपालले पार्टीले लिने नीति अनुसार आफूहरू अघि बढ्ने बताएका छन् ।

पुष्पलाल स्मृति दिवसको अवसरमा आयोजित कार्यक्रममा नेता नेपालले भने, ‘पार्टीभित्र छलफल चलिरहेको छ । पार्टी कसरी अगाडि बढ्छ सोही अनुसार आगामी बाटो तय गर्नेछौँ ।’

नेता नेपालले पार्टीमा आफूहरूमाथि धेरै अपमान भएको बताएका छन् । उनले अपमान सहेर कोही पनि बस्न नसक्ने बताएका छन् ।

उनले भने, ‘कसैलाई आफूले बनाएको घर छाडेर हिँड्ने मन हुन्न तर अपमान सहेर कोही पनि बस्दैन । गलत कुकर्म सहेर कोही पनि बस्न हुन्न । त्यो प्रशिक्षण हामीले पाएका छैनौँ ।’

उनले अरूको अपमान गर्नेले समाज र राष्ट्रको पनि अपमान गर्ने भएकाले त्यस्तो प्रवृत्तिलाई निरुत्साहित गनुपर्ने बताए।

कम्युनिस्ट आन्दोलनलाई बलियो बनाएर अगाडि बढ्नु पर्ने अहिलेको आवश्यकता रहेको बताउँदै उनले कम्युनिस्ट आन्दोलन सही दिशामा लिएर जाने क्रान्तिकारी पार्टीलाई बलियो बनाउन चाहेको बताए।