काठमाडौँ– नेपालका विभिन्न १५ बैंकको सिस्टम ह्याक गर्ने चेतावनी आएपछि नेपाल राष्ट्र बैंकले अनुसन्धान थालेको छ ।

इमेल तथा भाइबरबाट विभिन्न १५ बैंकको सिष्टम ह्याक गर्ने धम्की आएपछि राष्ट्र बैंकको आइटी टोली अनुसन्धानमा खटिएको राष्ट्र बैंकमा सहप्रवक्ता नारायणप्रसाद पोखरेलले बताए ।

उनले अहिले आफ्नै आइटी टीमले प्राप्त पत्रको बारेमा अनुसन्धान गरिरहेको बताउँदै आवश्यक परे प्रहरीको पनि सहयोग लिने बताए ।

उनले भने, ‘भाइबरमा आएको सूचना कसले पठाएको भन्ने खोजी भइरहेको छ । कुनै ह्याकर हो वा कसैले धम्कीमात्र दिएको हो अनुसन्धान गरिरहेका छौँ । आवश्यक परे प्रहरीको सहयोगमा यस्तो सूचना पठाउनेको खोजी गर्नेछौँ ।’ नेपालको बैंक प्रणाली मजबुत रहेको र यस्ता धम्कीबाट डराउनै नपर्ने उनले बताए।

यता नेपाल प्रहरीका प्रवक्ता एसएसपी बसन्तबहादुर कुँवरले राष्ट्र बैंकसहित १५ बैंकलाई आएको धम्कीबारे जानकारी आएको बताए । यसबारे प्रहरीले आफ्नो तवरबाट अनुसन्धान गरिरहेको कुँवरले बताए । उनका अनुसार यो फेक सूचना हुनसक्छ ।

उनले भने, ‘हाम्रो साइबर व्युरोले ह्याकिङको बारेमा सूचना आएपछि अनुसन्धान थालेको छ । अहिलेसम्मको अनुसन्धानबाट यो फेक भएको बुझिएको छ । थप अनुसन्धानमा हामी जुटेका छौँ ।’

कसैले धम्क्याउने प्रयोजनका लागि पनि उक्त इमेल र फोन गरेको हुनसक्ने आशङ्का गरिएको बैंकका अधिकारीहरू बताउँछन् । ह्याकरले पठाएको भनिएको म्यासेजमा नेपाल राष्ट्र बैंक, कुमारी बैंक, नेपाल बैंक, नबिल बैंक, राष्ट्रिय वाणिज्य बैंक, माछापुच्छ्रे बैंक, एनएमबि बैंक, एनआइसी एशिया बैंक, बैंक अफ काठमाण्डू, सिटिजन्स बैंक इन्टरनेशनल, सानिमा बैंक, नेपाल एसबीआई, एभरेष्ट, नेपाल इन्भेष्टमेन्ट र हिमालय बैंकको नाम उल्लेख गरी ती बैंकको सिस्टम ह्याक गरेर रकम निकालिने बताइएको छ ।