काठमाडौँ– कोभिड १९ महामारीविरुद्ध अमेरिकाले नेपाललाई उपलब्ध गराएको स्वास्थ्य सामग्रीको पहिलो खेप काठमाडौँ आइपुगेको छ ।

शनिबार अमेरिकी कार्गो विमानले ती स्वास्थ्य सामग्री काठमाडौँ ल्याएको हो । त्रिभुवन अन्तर्राष्ट्रिय विमानस्थलमा अमेरिकी अन्तरराष्ट्रिय विकास नियोग (युएसएआइडी) र अमेरिकी दूतावासका प्रतिनिधिले स्वास्थ्य मन्त्रालयका प्रवक्ता जागेश्वर गौतमलाई ती सामग्री हस्तान्तरण गरेका हुन् ।

शनिबार ल्याइएका सामग्रीमा सर्जिकल मास्क, फेस सिल्ड र ग्लोब्स संलग्न छन् । यसअघि १०० थान भेन्टिलेटर, परीक्षण किट्स, पीपीई, अक्सिजन उपकरण अमेरिकाले दिएको थियो ।

युएसएडले आइतबार एक हजार थान अक्सिजन सिलिन्डर प्रदान गर्ने तयारी गरेको छ । दुईदिनभित्र अमेरिकी कार्गो विमानले थप दुई खेप सामान ल्याउने परराष्ट्र मन्त्रालयले जनाएको छ ।

यसैबीच ‘युएसएआइडी’ ले आइतबार नेपाललाई थप सहयोग स्वरुप एक हजार थान अक्सिजन सिलिन्डर प्रदान गर्ने भएको छ ।