सन्त एकनाथ हरेक दिन गङ्गामा स्नान गर्न जान्थे । एक दिन उनी स्नान गरेर फर्किंदै थिए, बाटोमा एकजनाले उनमाथि थुकिदियो । केही नबोली एकनाथ पुनः नुहाउन गए ।

फर्किंदै गर्दा फेरि त्यस व्यक्तिले थुकिदियो । एकनाथ फेरि गङ्गातिर गए र स्नान गरेर आफूलाई स्वच्छ बनाए । एक्काइस पटक यस्तो भयो तर एकनाथ रिसाएनन् । उनी शान्त भइरहे ।

अन्त्यमा त्यो व्यक्तिले सन्त एकनाथको अगाडि झुकेर भन्यो— महाराज ! मैले तपाईंलाई यस्तो नराम्रो व्यवहार गर्दा पनि तपाईंले शान्ति र क्षमाको पराकाष्ठा देखाउनुभयो ।’

एकनाथले भने— मैले कुनै विशेष काम गरेको होइन । तिमीजस्तो सहायक र उपकारी त कहिलेकाहीँ मात्र पाइन्छ । तिम्रो कृपाले आज मैले २१ पटक गङ्गामा स्नान गर्ने मौका पाएँ । मेरो जीवनमा यो पहिलो अवसर हो ।

साभार : ‘विश्वका उत्कृष्ट प्रेरक प्रसङ्गहरु’ पुस्तकबाट