काठमाडौँ – भारतीय जेलबाट ४० वर्षपछि रिहा भएका नेपाली नागरिक दुर्गाप्रसाद तिम्सिना (दीपक जैसी) लाई क्षतिपूर्ति दिने विषयमा विचार गर्नु उपयुक्त हुने कोलकाता उच्च अदालतले आदेश दिएको छ ।

इलामका तिम्सिनाको मुद्दामाथि फैसला गर्दै सोमबार कोलकाताको उच्च अदालतले उनको परिवारले मागे कानुन अनुसार क्षतिपूर्ति दिन पश्चिम बंगाल सरकारलाई निर्देशन दिएको उनका वकिल हिरक सिन्हाले जानकारी दिए ।

शनिबार कारागारमुक्त भएका तिम्सिना हिजो (आइतबार) इलामस्थित आफ्नो घर पुगिसकेका छन् ।

अदालतको दस्तावेजनमा उनलाई दीपक जोशी भनिएको छ । उच्च अदालतका मुख्य न्यायाधीशसहितको दुई सदस्यीय इजलासले सोमबार जारी गरेको आदेशमा दीपकको परिवार विपन्न भएको तथा उनी पक्राउ र जेल परेपछि परिवारले सामाजिक चुनौती खेप्नु परेको आफूलाई बताइएको उल्लेख छ ।

‘झन्डै ४१ वर्ष बिना सुनुवाइ अन्य आवश्यक प्रक्रिया अवलम्बन नगरी थुनामा परेकाले उनलाई क्षतिपूर्ति दिने आदेश राज्यलाई दिएर सहयोग गर्नुपर्छ भन्ने हामीलाई लागेको छ ।’ आदेशमा भनिएको छ, ‘यस विषयमा राज्यलाई क्षतिपूर्तिबारे आदेश दिनु उपयुक्त हुन्छ कि भनेर विचार गर्नु उपयुक्त हुन्छ भन्ने हामीलाई लागेको छ ।’

चार पृष्ठको आदेशमा पश्चिम बंगाल राज्यका प्रमुख न्यायाधिवक्तालाई यो विषयमा जानकारी गराउँदै अदालतले सरकारले उपयुक्त प्रतिक्रिया जनाउने विश्वास व्यक्त गरेको छ ।

यस्तै, अदालतले पश्चिम बंगाल राज्यभरिका विभिन्न जेलमा रहेका मानसिक रोगीको अवस्थाबारे दुई दिनभित्र अदालतलाई जानकारी गराउन निर्देशनसमेत दिएको छ । दुर्गाप्रसाद सन् १९८० मा भारतको दार्जिलिङबाट पक्राउ परेका थिए ।