काठमाडौँ– सञ्चार तथा सूचना प्रविधिमन्त्री पार्वत गुरुङले वर्तमान सरकारले देश र जनतालाई प्राथमिकतामा राखेर काम गरेको बताएका छन्।

सामुदायिक रेडियो प्रसारक संघ (अकोराब) नेपालको २० औँ स्थापना दिवसका अवसरमा सोमबार काठमाडौंमा आयोजित ‘सामुदायिक रेडियो : नीतिगत बहस’ विषयको अन्तर्क्रियामा मन्त्री गुरुङले यस्तो बताएका हुन् ।

उनले माओवादीले दिएको समर्थन फिर्ता लिने वित्तिकै सरकार अल्पमतमा पर्ने भएपनि सरकारले जनता र देश केन्द्रीत कार्यलाई प्राथमिकतामा राखेको बताए ।

उनले अहिले एमालेलाई सत्तामा रहँदा जनताको काम गर्ने अवसर र प्रतिपक्षीमा रहनु परे पनि संगठन निर्माणको अवसर मिल्ने जिकिर गरे ।

उनले समुदायका निम्ति खोलिएका सामुदायिक रेडियो समुदायप्रति साँच्चिकै उत्तरदायी भएरनभएको बारे समीक्षा गर्नुपर्ने जिकिर गरे ।

उनले पछिल्लो समय सामुदायिक रेडियोका नाममा भएका विकृति हटाउनुपर्ने जनाउँदै सामुदायिक रेडियोमा प्रसारण हुने विषयवस्तुबारे पनि समीक्षा हुनुपर्नेमा जोड दिए ।

सांसद राधेश्याम अधिकारीले सामुदायिक रेडियो महिला, दलित लगायत सीमान्तकृत समुदायप्रति उत्तरदायी हुनुपर्ने बताए ।

त्यस्तै सांसद रामनारायण बिडारीले सामुदायिक रेडियोमैत्री सञ्चारसम्बन्धी ऐन/कानून बनाउन सरकारसमक्ष आग्रह गरे ।

सामुदायिक रेडियोको हकहितका लागि छाता सङ्गठनका रुपमा २०५७ साल चैत ९ गते स्थापित अकोराब अहिले मुलुकका ७७ वटै जिल्लामा फैलिएको छ । संस्थाको सदस्यका रुपमा ३६० सामुदायिक रेडियो छन् ।