मुम्बई– बलिउडका प्रख्यात लेखक तथा निर्देशक सागर सरहदीको सोमबार बिहान मुम्बईमा निधन भएको छ । उनी ८८ वर्षका थिए ।

उनी मुटुमा समस्या देखिएपछि मुम्बईको एक अस्पतालको आइसियू वार्डमा भर्ना भएका थिए । उनलाई यसअघि सन् २०१८ को फेब्रुअरीमा हृदयघात भएपछि यही अस्पतालमा भर्ना गरिएको थियो ।

नवभारत टाइम्समा प्रकाशित समाचार अनुसार सागरले ‘नूरी’, ‘बाजार’, ‘कभी कभी’, ‘सिलसिला’, ‘चांदनी’, ‘दीवाना’ र ‘कहो ना प्यार है’ जस्ता हिट फिल्मका स्क्रिप्ट लेखेका थिए ।

उनको वास्तविक नाम गंगा सागर तलवार थियो । उनको जन्म वर्तमान पाकिस्तानको एबाटाबादमा सन् १९३३ मा भएको थियो ।
समयसँगसँगै सागरको ध्यान थिएटरतिर जान थाल्यो र उनी इप्तासँग जोडिए ।

सागरले नै रंगमञ्चको दुनियाँमा फारुख शेख र शबाना आजमी जस्ता कलाकारलाई मौका दिएका थिए । उनले स्मिता पाटिल, फारुख शेख र नसीरुद्दीन शाहको प्रमुख भूमिका रहेको फिल्म ‘बाजार’को निर्देशन गरेका थिए ।