काठमाडौँ– भारतीय जनता पार्टी (भाजपा) का विदेश विभाग प्रमुख डा. विजय चौथाइवालाले नेपालका पूर्व प्रधानमन्त्री डा. बाबुराम भट्टराईले गरेको ट्वीटप्रति आपत्ति जनाएका छन् ।

डा. भट्टराईले भारत, उत्तर प्रदेशका मुख्यमन्त्री योगी आदित्यनाथले नदीमा दूध चढाइरहेको तस्वीर ट्वीट गरेका थिए । उक्त तस्वीरमा लेखिएको विषयले हिन्दूहरूको अपमान भएको भन्दै सर्वत्र आलोचना भइरहेको अवस्थामा भाजपाका विदेश विभाग प्रमुख चौथाइवालाले पनि आपत्ति जनाएका हुन् ।

उनले डा. भट्टराईले इदको अवसरमा हिन्दूहरूको अपमान गरेको आरोप लगाएका छन् । चौथाइवालाले ट्वीटरमा भनेका छन्, ‘यो स्पष्ट हुन्छ कि तपाईं र तपाईंको सहपाठी इदको अवसरमा हिन्दू धर्म र रीतिरिवाजलाई अपमान गरिरहनु भएको छ ।’

Dear Shri @brb1954 ji, it’s quite obvious that you and your classmates would insult Hindu faith and rituals on the occasion of Eid. https://t.co/wNm2nLhaTM

— Dr Vijay Chauthaiwale (@vijai63) July 21, 2021

जनता समाजवादी पार्टी (जसपा) का संघीय परिषद अध्यक्षसमेत रहेका भट्टराईले भारतीय सहपाठीमार्फत पाएको तस्वीर भन्दै आदित्यनाथको तस्वीर ट्वीट गरेका छन् ।

उक्त तस्वीरमा ‘विश्वास खतरनाक चिज भएको र त्यसले दूध फालेर मुत्र पिलाउने’ भनाइ उल्लेख छ । सोही अभिव्यक्ति मुख्यमन्त्री आदित्यनाथले नदीमा दूध चढाइरहेको तस्वीरमा राखेर सामाजिक सञ्जालमा पोष्ट गरिएपछि हिन्दू धर्मप्रति आस्था राख्ने व्यक्तिहरूले आपत्ति जनाएका छन् ।

( Circulated by my classmates in India) pic.twitter.com/cJLDuANLDd

— Baburam Bhattarai (@brb1954) July 21, 2021

भट्टराईको ट्वीटप्रति राप्रपा अध्यक्ष कमल थापाले पनि आपत्ति जनाएका छन् । उनले आगोसँग नखेल्न भट्टराईलाई चेतावनी पनि दिएका छन् ।