काठमाडौँ– नेकपा एमालेका वरिष्ठ नेता माधव नेपाल पक्षीय सांसदहरूको भेला सुरू भएको छ । सिंहदरबारस्थित लेखा समितिको हलमा सांसदहरू भेला भएका हुन् ।

भेलामा राष्ट्रपति विद्यादेवी भण्डारीले सरकार बनाउन दिएको समय सीमाबारे छलफल हुने बताइएको छ । माधव नेपालसहित २० जनाभन्दा बढी सांसद भेलामा सहभागी छन् ।

उक्त भेलामा नेपाली कांग्रेस र माओवादी केन्द्रका नेताहरू पनि सहभागी भएका छन् । नेपाली कांग्रेस संसदीय दलका प्रमुख सचेतक बालकृष्ण खाण र माओवादी नेताहरू वर्षमान पुन तथा देव गुरुङ नेता नेपाल पक्षीय सांसदको भेलामा पुगेका हुन् ।

जसपाको उपेन्द्र यादव पक्षीय नेता मोहम्मद इश्तियाक राई पनि बैठक स्थलमा देखिएका छन् । नेपाल पक्षका सांसदको भेलामा कांग्रेस र माओवादीका नेताहरू सहभागी हुनुलाई अर्थपूर्ण रूपमा हेरिएको छ ।

राष्ट्रपतिले बिहीवार साँझ संविधानको धारा ७६ (५) बमोजिम नयाँ सरकार गठनको आह्वान गरेसँगै दलहरु छलफलमा जुटेका हुन् ।