सोलुखुम्बु– नेपाली काँग्रेस सोलुखुम्बुका पूर्व जिल्ला सभापति आङगेलु शर्पाको क्रियाशील सदस्यताको सूचीबाटै नाम हटाइएको पाइएको छ ।

सोलुखुम्बु जिल्ला समितिले ढिलो गरि बुझेर ल्याएको पुराना क्रियाशील सदस्यहरुको सूचीमा पूर्व सभापति शेर्पाको परिवारकै नाम समावेश नगरिएको पाइएको हो ।

पूर्व जिल्ला सभापतिका वुवा एवं पञ्चायतकालका काँग्रेसका जिल्ला उपसभापति नुरुवाङ्डा शेर्पा लगायतको उनको परिवारको नाम नै नवीकरणको सूचीमा नरहेको सोलुदुधकुण्ड नगरपालिका ३ का काँग्रेस ईकाइ सभापति कृष्णगोपाल राजभण्डारीले बताए ।

सभापति राजभण्डारीले आफूलाई जिल्ला समितिले दिएको सूचीमा पूर्व सभापति शेर्पा परिवार कसैको पनि नाम नरहेको उल्लेख गरे ।

क्रियाशील सदस्यता नवीकरण गर्न गाउँ गएका पूर्व सभापति शेर्पाले सूचीमा आफ्नो नाम नभेटेपछि पार्टी भित्रैको षड्यन्त्र भएको प्रतिक्रिया दिएका छन् । लगातार ३ कार्यकालसम्म काँग्रेस सोलुखुम्बुको नेतृत्व गरेका शेर्पाको नाम हटाईउनुलाई पार्टी भित्रको ‘इतर गुटको चलखेल’को रुपमा लिइएको छ ।

यता जिल्ला सभापति विनोद बस्नेतले भने सबै क्रियाशील सदस्यहरुको सूची वडा समितिलाई नै बुझाएको दाबी गरेका छन् ।