मुम्बई– बलिउड अभिनेत्री दीपिका पादुकोण आफ्ना समकालिन अभिनेत्रीलाई पछि पार्दै ‘बलिउडकी प्रिय अभिनेत्री’ बनेकी छन् ।

ओरम्याक्स मिडियाले सामाजिक सञ्जालमा फ्यानको उपस्थिति तथा अनलाइन भोटिङमार्फत गरिएको सर्वेक्षणमा दीपिकालाई सर्वाधिक भोट प्राप्त भएको थियो ।

बलिउड लाइफमा प्रकाशित समाचारअनुसार बलिउडकी ‘मस्तानी’का रुपमा परिचित दीपिकाको पछिल्लो फिल्म ‘छपाक’ हो । उनी चाँडै नै शाहरुख खानसँग फिल्म ‘पठान’मा देखिँदैछिन् ।

अभिनेत्री आलिया भट्ट मत परिणाममा दोस्रो स्थानमा परिन् । उनी यो समयमा ‘गंगुबाइ काठियावाडी’, ‘आरआरआर’ र ‘ब्रह्माश्त्र’ जस्ता ठूला बजेटका फिल्ममा व्यस्त छिन् ।

परिणामको तेस्रो स्थानमा अभिनेत्री कटरीना कैफ छिन् । अभिनेता अक्षय कुमारसँग अभिनित उनको फिल्म ‘सूर्यवंशी’ रिलिजको तयारीमा छ ।

अभिनेता शक्ति कपुरकी छोरी श्रद्धा कपुर चौथो नम्बरमा छिन् । उनी पछिल्लो पटक फिल्म ‘बाघी ३’मा देखिएकी थिइन् । उनी हाल लभ रञ्जनको नयाँ फिल्ममा अभिनेता रणवीर कपूरसँग व्यस्त छिन् । फिल्म सन् २०२२ मा रिलिज हुनेछ ।

बलिउडको सुन्दरी अभिनेत्रीमा चिनिने करीना कपूर खान पाँचौं प्रिय अभिनेत्रीमा दरिएकी छन् । उनी चाँडै नै अभिनेता आमिर खानसँग फिल्म ‘लालसिंह चड्डा’मा देखिदैछिन् ।