काठमाडौँ– नेपाली कांग्रेसका नेता प्रकाशमान सिंहले नयाँ सरकार गठनका निम्ति प्रधानमन्त्री केपी शर्मा ओलीले राजीनामा दिनुपर्ने बताएका छन् ।

आइतबार चाक्सीबारीस्थित आफ्नै निवासमा नेकपा (एमाले) र नेकपा (माओवादी केन्द्र) परित्याग गरेका कार्यकर्ताहरुलाई कांग्रेस पार्टीमा प्रवेश गराउँदै नेता सिंहले सरकार गठनका निम्ति प्रधानमन्त्री ओलीले नैतिकताको आधारमा राजीनामा दिनुपर्ने बताएका हुन् । प्रधानमन्त्री ओलीले न्यूनतम नैतिकतासमेत नदेखाएको उनको भनाइ छ ।

माओवादी केन्द्रले सरकारको समर्थन फिर्ता नलिएको तथा जनता समाजवादी पार्टी (जसपा)ले सरकारको राजीनामा माग नगरेको परिस्थिति भए पनि राजनीतिको मूल्य–मान्यताको ख्याल गर्दै प्रधानमन्त्रीले राजीनामा दिनुपर्ने उनले बताए ।

कम्युनिस्ट पार्टीले जनताले पाँच वर्षको लागि दिएको म्यान्डेड पूरा गर्न नसकेको पनि उनले बताए । अब राजनीतिक अस्थिरताबाट देशलाई मुक्ति दिलाउनको लागि सबै दलहरु लागेर अगाडि बढ्नुपर्ने र निकास दिनुपर्ने उनको भनाइ छ ।