झापा- झापाका विभिन्न स्थानबाट एकै दिन ब्राउन सुगरसहित ६ जना पक्राउ परेका छन् ।

अर्जुनधारा ११ विर्तामोड बसपार्कबाट झापा भद्रपुर ९ गरामनीका १९ वर्षीय पवन भनिने साईल खानलाई प्रहरीले लागुऔषध ब्राउन सुगरसहित पक्राउ गरेको हो । उनको साथबाट ५ ग्राम लागुऔषध बरामद भएको छ ।

यस्तै पूर्वी सिमाक्षेत्र मेचीनगर १३ चारआलीबाट एकसाथ तीन जना पक्राउ परेका छन् । पक्राउ पर्नेमा मेचीनगर १५ का ३० वर्षीय कुमोलाल राजवंशी, सोही ठाउँका २४ वर्षीय सञ्जय मुखिया र भद्रपुर १० का १९ वर्षीय श्रवण मुखिया रहेको जिल्ला प्रहरी कार्यालय झापाले जनाएको छ । प्रहरीका अनुसार उनीहरुको साथबाट २९ ग्राम ब्राउनसुगर फेला परेको छ ।

यस्तै भद्रपुर ४ डाँगीबारीबाट विर्तामोड ८ का १९ वर्षीय सरोज सुनुवार र सोही ठाउँका १९ वर्षीय अभिषेक राजवंशी पनि ब्राउन सुगरसहित पक्राउ परेका छन् ।

जिल्ला प्रहरी कार्यालय झापाका प्रवक्ता प्रहरी नायव उपरीक्षक राकेश थापाका अनुसार उनीबाट २ ग्राम ४३ मिलिग्राम ब्राउन सुगर पनि भेटिएको छ । प्रक्राउ परेका सवै माथि अदालतबाट म्याद थप भई अनुसन्धान भई रहेको प्रहरीले जनाएको छ ।