काठमाडौं– ब्लकबस्टर र तेलुगु फिल्म ‘अर्जुन रेड्डी’को नेपाली रिमेक भर्सनका लागि कलाकारको खोजी शुरु भएको छ । युवा फिल्मसले निर्माण गर्न लागेको नेपाली रिमेक भर्सनका लागि प्रमुख पुरुष र महिला कलाकारको खोजी गरिएको हो ।

युवा फिल्मसले प्रमुख पुरुष कलाकारको हकमा २५ देखि ३० वर्षसम्मको उमेर र महिला कलाकारको हकमा २० देखि २२ वर्षसम्मको उमेर तोकेको छ ।

यस्तै सह–अभिनेताका लागि पुरुषको हकमा २५ देखि ३० वर्षसम्म र सह–अभिनेत्रीका लागि २० देखि २५ वर्षसम्मको उमेर तोकेको छ ।

निर्माण टिमले फिल्ममा अभिनय गर्न इच्छुकले एक तस्वीर, उमेर समूह र फोन सम्पर्क नम्बर पठाउन अनुरोध गरेको छ । इच्छुकले contact@yuvafilms.com मा इमेल गर्न सक्ने निर्माण टिमले जनाएको छ ।

केही समय अघि ‘अर्जुन रेड्डी’को निर्माण कम्पनी भद्रकाली पिक्चर्सको तर्फबाट निर्माता प्रणय रेड्डी र युवा फिल्म्सका तर्फबाट केशव खड्काले अमेरिकामा निर्माण सम्झौतामा हस्ताक्षर गरेका थिए ।