काठमाडौँ– वाणिज्य, आपूर्ति तथा उपभोक्ता संरक्षण विभागले दोहोर बिल बनाइ ठगी गर्ने एक तेल कम्पनीमाथि कारबाही गरेको छ ।

काठमाडौँको नागार्जुन नगरपालिका वडा नं- ४ स्थित श्री भण्डारी स्टोरले विभिन्न ब्रान्डका सन्फ्लावर तथा सोयाबिन खाने तेल बिक्री गर्दा दोहोरो बिल (इष्टिमेट र कर बिजक) जारी गरी उपभोक्ता ठगी गरेको पाइइपछि जरिवाना तिराइएको विभागले जनाएको हो ।

विभागका निर्देशक एवं प्रवक्ता शिवराज सेढाईंले उक्त कम्पनीले दोहोरो बिल बनाइ उपभोक्ता ठगी गरेको पाइएको हुँदा २ लाख ५० हजार जरिवाना गरिएको जानकारी दिए ।

उनले भने, ‘उपभोक्ता संरक्षण ऐन, २०७५ को दफा १६(२)(क) बमोजिमको कसुर गरी प्रति कार्टुन ५०/- बढि लिई बिक्री बितरण गरेको पाइएको हुँदा उक्त ऎनको दफा ३९(ख) बमोजिम तत्कालको लागि रु २,५०,०००।- जरिवाना गरिएको छ।’