काठमाडौँ– अभिनेता मुकुन भुषाल र अभिनेत्री मेनुका प्रधानको मुख्य भूमिका रहने फिल्म ‘गणपति’ को बिहीवार तनहुँ बन्दीपुर गाउँपालिका थारुबासबाट छायांकन सुरु भएको छ ।

गाउँले परिवेशको कथामा बन्न लागेको फिल्मको आधिकांश छायांकन तनहुँ बन्दीपुरमा नै हुनेछ ।

सविन अधिकारीको निर्देशन रहने फिल्ममा उनकै कथा, पटकथा तथा संवाद छ । लक्ष्मण थापा, विज्ञान केसी र अरविन्द्र गिरीको लगानी रहने फिल्ममा मुकुन र मेनुकाका अलावा सूर्यमाला खनाल, जयनन्द लामा, प्रकाश घिमिरे, राजाराम पौडेल, पुष्कर गुरुङ, अंशु मानन्धर, कालु राना, अर्जुन गुरुङ, शुशील पोखरेल, श्रीदेव वि.एल लगायतको अभिनय रहनेछ ।

भगवान र मानिसबीचको फरक देखाइने फिल्ममा हरिबहादुर घलेको छायांकन, विक्रम स्वारको कोरियोग्राफी र मौसम बस्नेतको पहिरन रहनेछ । फिल्मको गीतमा अनिस अधिकारीले शब्द तथा संगीत भरेका छन् भने अनिस अधिकारी र देवेन्द्र बब्लुले स्वर दिएका छन् ।

त्यस्तै, गोविन्द शाहीले देशभर वितरण अधिकार दिएको फिल्मको ओभरसिज राइट्स स्रित फिल्मस् एण्ड इन्टरटेन्मेन्टले लिएको छ । निर्देशक अधिकारीले ‘गणपति’ नाम धार्मिक सुनिए पनि फिल्ममा कुनै पनि धर्मको विरोध वा प्रचार नगरिने जानकारी दिएका छन् ।