काठमाडौँ- प्रधानमन्त्री कप पुरुष एकदिवसीय राष्ट्रिय क्रिकेट प्रतियोगिता अन्तर्गत आज भएको लुम्बिनी प्रदेश विरुद्धको खेलमा नेपाल पुलिस क्लब ७४ रनले विजयी भएको छ ।

कीर्तिपुरस्थित विश्वविद्यालय क्रिकेट मैदान पुलिसले दिएको ३११ रनको लक्ष्य पछ्याएको लुम्बिनीले पूरा ओभर खेल्दै ७ विकेट गुमाएर २ सय ३६ रन बनाएको छ।

लुम्बिनीका लागि २ सय ३६ रन बनाउन सौरभ खनालले ७४ रन प्रहार गरे। उनले ६० बलमा ५ छक्का र १ चौकाको मद्दतले ७४ रन बनाएका हुन्।

यस्तै कप्तान कृष्ण कार्कीले २४ बलमा ५ छक्काको मद्दतले ४० रन प्रहार गरेका हुन्। यस्तै देव खनालले ४९ रन र सन्दिप रजाइलीले ४० रन बनाए भने राजविर सिंहले २४ रन प्रहार गरे।

लुम्बिनीविरुद्ध पुलिसका लागि राशिद खान र पवन शर्राफले समान २/२ विकेट लिए भने सागर ढकाल, दिपेन्द्र सिंह ऐरी र ललित नारायण राजवंशीले समान १/१ विकेट लिएका थिए।

टस हारेर पहिलो ब्याटिङ गरेको पुलिसले निर्धारित ओभरमा ४ विकेट गुमाएर ३ सय १० रन बनाएको थियो ।

लुम्बिनीविरुद्ध पुलिसका युवा खेलाडी पवन शराफले किर्तिमानी अर्धशतक प्रहार गरे। उनले प्रधानमन्त्री कप क्रिकेटमा फास्टेस्ट फिप्टीको किर्तिमान बनाएका हुन्।

उनले १३ बलको सामना गर्दै ६ छक्का र १ चौकाको मद्दतमा ५० रन बनाए । यस्तै पुलिसका लागि सुनिल धमलाले शतक प्रहार गरेका थिए। उनले १ सय ४५ बलको सामना गर्दै ७ चौका १ छक्कासहित १०४ रन बनाए।

यस्तै दिपेन्द्र सिंह ऐरीले ६१ बलमा ६ छक्का र १ चौकासहित ८५ रन बनाए भने आरिफ शेखले १४ बलमा २९ रन प्रहार गरे।

पुलिसविरुद्व लुम्बिनीका कृष्ण कार्की, दिपेन्द्र रावत, सौरभ खनाल, अनिल खरेलले समान १/१ विकेट लिए। लुम्बिनीले पाएको यो लक्ष्य पनि जारी प्रतियोगितामा सबैभन्दा ठूलो लक्ष्य हो।

जितसँगै ३ खेल खेलेको पुलिसले ४ अंक जोडेको छ भने लुम्बिनीले २ खेलबाट २ अंक जोडेको छ।