मुम्बई(एजेन्सी) । बलिउडका लागि आज जनवरी २१ विशेष दिन हो । किनकी आजकै दिन अभिनेता सुशान्तसिंह राजपुतको जन्म भएको थियो । छोटो समयमै राम्रा फिल्ममा अभिनय गरेर चर्चा कमाएका सुशान्त हामी माझ छैनन् ।

कामको कुरा गर्दा सुशान्तलाई धेरैले टेलिभिजन र फिल्म नै सम्झन्छन् । तर उनको अर्को पाटो सायदै कमैलाईमात्र थाहा होला । सुशान्तलाई फिल्मका अलावा अन्तरिक्षमा विशेष लगाव थियो । उनी चन्द्रमामा जमिन किन्ने पहिलो बलिउड अभिनेता थिए । उनले सन् २०१८ मा चन्द्रमामा जमिन किनेका थिए । उनको यो जमिन ‘सी अफ मसकोवी’मा छ । उनले यहाँ इन्टरनेशनल लुनार लेजेण्ड्स रजिष्ट्रीबाट जमिन खरिद गरेका थिए ।

उनीसँग अन्तरिक्ष प्रति विशेष लगाव थियो । त्यहीकारण उनले विशेष प्रकारको एडभान्स टेलिस्कोप १४ एलएस०० पनि राखेका थिए । यो टेलिस्कोपमार्फत उनी सेटर्न रिंग्ससँगै तारा र अन्य ग्रह हेर्दथे ।

यद्यपि अन्तर्राष्ट्रिय संगठनहरुले चन्द्रमामा कानूनी रुपमा कसैलाई पनि जमिनको मालिक बन्ने अधिकार नरहेको बताउदै आएका छन् । पृथ्वी भन्दा बाहिर दुनियाँ मानव जातिको धरोहर रहेको र यसमा कुनै पनि देशले कब्जा गर्न नसक्ने उनीहरुको बुझाई छ ।

३४ वर्षे सुशान्त गत वर्षको जून १४ मा बान्द्रास्थित आफ्नो फ्ल्याटमा झुण्डिएको अवस्थामा फेला परेका थिए । उनको मृत्युको विषयलाई लिएर सीबीआई, इडी र एनसिबी जस्ता देशका ठूला अनुसन्धान एजेन्सीले अनुसन्धान गरे पनि कुनै निश्कर्षमा पुग्न सकेका छैनन् ।